VYUO AFRIKA MASHARIKI KUANZA SOMO LA AKILI MNEMBA

 

Na Hawa Ismail- Dar es Salaam 

Wanafunzi wa vyuo vikuu Afrika Mashariki wanatarajiwa kupata uelewa wa msingi kuhusu matumizi salama, maadili na fursa za Akili Mnemba (AI), kupitia somo maalum linaloandaliwa kwa matumizi katika taasisi za elimu ya juu.

Hatua hiyo imeelezwa na Naibu Katibu Mkuu wa Baraza la Vyuo Vikuu Afrika Mashariki (IUCEA), Profesa Idris Rai, wakati wa warsha ya wataalamu na makamishna wa elimu ya juu kutoka nchi wanachama wa Jumuiya ya Afrika Mashariki (EAC), inayolenga kuthibitisha na kuridhia somo hilo.

Profesa Rai amesema mpango huo unalenga kuhakikisha wanafunzi wanakuwa na uelewa wa matumizi ya AI katika kufanya maamuzi, huku wakizingatia maadili, usalama na miongozo ya matumizi ya teknolojia hiyo.

Amesema somo hilo linatarajiwa kutumika katika taaluma mbalimbali ikiwemo Sheria, Tiba, Lugha na Uhandisi, ili kuwawezesha wanafunzi na walimu kutumia AI katika ufundishaji, ujifunzaji na tafiti.

Kwa upande wake, Afisa Udhibiti Ubora Mkuu kutoka Tume ya Vyuo Vikuu Tanzania (TCU), Dkt. Mariam Issa Hamisi, amesema TCU inaendelea kushirikiana na IUCEA kuhakikisha matumizi ya AI katika vyuo vikuu yanafuata viwango vya ubora, maadili na kulinda hadhi ya taasisi za elimu ya juu.

Naye Mshauri wa Sera za AI Afrika Mashariki kutoka GIZ, Evelyn Elliseus Rutazala, amesema kujengewa uwezo katika teknolojia hiyo kutasaidia Afrika Mashariki kuondokana na utegemezi wa teknolojia kutoka nje na kuongeza wataalamu wanaoweza kutengeneza mifumo inayozingatia mahitaji ya ukanda huo.

Mhadhiri na Kaimu Mkuu wa Idara ya Sayansi za Kompyuta wa UDOM, Daniel John Ngondya, amesema chuo hicho kinaendelea kushiriki katika kuimarisha matumizi ya AI katika elimu ya juu kupitia nafasi yake kama kituo cha AI, huku mpango huo ukitarajiwa kuongeza ujuzi wa wanafunzi kuhusu matumizi sahihi na yenye maadili ya teknolojia hiyo.

Angel hii inaweka elimu na maandalizi ya wanafunzi mbele, hivyo habari inakuwa tofauti zaidi na ile ya kuanzia moja kwa moja na IUCEA.