BENKI KUU YANUNUA DHAHABU YA NDANI, KUONGEZA AKIBA YA FEDHA ZA KIGENI

Na Wellu Mtaki, Manyara

Benki Kuu ya Tanzania (BoT) imeeleza kuwa mpango wa kununua dhahabu inayozalishwa nchini umechangia kuongeza akiba ya fedha za kigeni kwa zaidi ya dola bilioni mbili za Marekani, hatua inayolenga kuimarisha uchumi wa taifa na kuongeza thamani ya rasilimali za madini zinazozalishwa nchini.

Kupitia mpango huo, Benki Kuu imenunua sehemu ya dhahabu inayozalishwa nchini, huku ikichangia kurasimisha sekta ya madini na kutambua mchango wa viwanda vya ndani vinavyohusika na uchenjuaji na usafishaji wa dhahabu.

Hatua hiyo pia inalenga kuhakikisha kuwa rasilimali za madini zinawanufaisha Watanzania na kuchochea ukuaji wa uchumi kupitia usimamizi bora wa mapato yatokanayo na madini.

Mbali na ununuzi wa dhahabu, Benki Kuu inaendelea kutekeleza majukumu yake ya msingi, yakiwemo kusimamia sera ya fedha, kutoa huduma za kibenki kwa Serikali ya Jamhuri ya Muungano wa Tanzania na Serikali ya Mapinduzi ya Zanzibar, pamoja na kusimamia mifumo ya malipo nchini.

Katika eneo la malipo, BoT imeendelea kuhamasisha matumizi ya mifumo ya kielektroniki ili kupunguza utegemezi wa fedha taslimu, kuongeza usalama wa miamala na kurahisisha shughuli za kifedha kwa wananchi, wafanyabiashara na taasisi za serikali.

Mifumo hiyo inajumuisha malipo kati ya benki, matumizi ya hundi na miamala inayounganisha benki na mitandao ya simu, hatua inayowezesha wananchi kufanya miamala kwa urahisi bila kulazimika kubeba kiasi kikubwa cha fedha taslimu.

Matumizi ya mifumo ya kielektroniki pia yanaweza kupunguza gharama za uendeshaji wa miamala na kurahisisha Serikali kupanga na kutekeleza matumizi yake ya fedha.

Aidha, Benki Kuu ina jukumu la kusimamia uchapishaji na usambazaji wa noti na sarafu katika mzunguko, pamoja na kuondoa fedha zilizochakaa na zisizofaa kutumika.

Kupitia utaratibu huo, noti zilizochakaa hukusanywa kupitia taasisi za fedha na kuwasilishwa Benki Kuu kwa ajili ya kuchambuliwa. Noti zinazokidhi viwango vya ubora zinaweza kurejeshwa kwenye mzunguko, huku zile zisizofaa zikitolewa na kubadilishwa kwa fedha zinazokidhi viwango vinavyotakiwa.

Benki Kuu pia inaendelea kutoa elimu kwa wananchi kuhusu namna ya kutambua noti halali na kuzitunza ili ziendelee kutumika kwa muda mrefu.

Katika kuhakikisha wananchi wanapata taarifa sahihi kuhusu huduma zake, taasisi hiyo imekuwa ikitumia vyombo vya habari, ikiwemo redio kupitia vipindi vya elimu ya fedha kama Ongea na BoT, kuwafikia wananchi na kuwaeleza majukumu yake pamoja na huduma zinazopatikana.

Vilevile, wananchi wanahimizwa kutumia njia rasmi za kuwasilisha malalamiko yanayohusu huduma za kifedha ili yaweze kushughulikiwa na taasisi husika kwa mujibu wa taratibu zilizowekwa.

Hatua hizo zinaonesha kuwa majukumu ya Benki Kuu hayaishii katika kusimamia sera ya fedha na ununuzi wa dhahabu pekee, bali yanahusisha pia usalama wa fedha, upatikanaji wa huduma za malipo na ulinzi wa maslahi ya watumiaji wa huduma za kifedha nchini.