Mbunge Mariam Kisangi na Diwani Fadhili Mboga Watoa Zawadi kwa Timu za Vijana Makangarawe
Na Hawa- Ismail- Dar es Salaam
Mbunge wa Jimbo la Temeke, Mariam Kisangi, ameahidi kuimarisha sekta ya michezo katika wilaya hiyo kwa lengo la kukuza vipaji vya vijana, kuongeza ajira, na kuimarisha mshikamano wa kijamii. Kauli hiyo ameitoa Disemba 28, 2025, jijini Dar es Salaam wakati wa hafla ya kukabidhi zawadi ya mbuzi wawili kwa timu za vijana za Mnalani na Msakala.
Zawadi hizo zilitolewa kama sehemu ya kutambua ushiriki wa timu hizo katika mashindano ya vijana ya "Tupendane Cup" yanayofanyika katika kata ya Makangarawe, wilayani Temeke. Akizungumza katika hafla hiyo, Kisangi alisisitiza dhamira yake ya kushirikiana na viongozi wa kata kuhakikisha vipaji vya vijana vinatambuliwa na kuendelezwa.
"Nitakuwa bega kwa bega na Diwani wa Makangarawe, Fadhili Mboga, kuhakikisha tunatengeneza mazingira bora ya kukuza vipaji vya vijana wetu. Nawapongeza vijana wote waliopambana tangu mwanzo wa ligi hadi leo mnapohitimisha," alisema Kisangi.
Kwa upande wake, Diwani wa Kata ya Makangarawe, Fadhili Mboga, aliwataka vijana wa kata hiyo kuendelea kuonyesha vipaji vyao kupitia michezo mbalimbali ikiwemo mpira wa miguu na ngumi. Alieleza kuwa michezo ni njia bora ya kuwaunganisha vijana na kuwajengea nidhamu na maadili.
"Tunawaunga mkono vijana wa Makangarawe kwa kuongeza zawadi ya mbuzi wawili na ng’ombe mmoja ili waweze kusherehekea mwaka mpya kwa furaha. Hii ni motisha kwa wale waliotoa mchango mkubwa katika mashindano haya ya Tupendane Cup," alisema Mboga.
Mboga pia alitumia fursa hiyo kumshukuru Rais wa Jamhuri ya Muungano wa Tanzania, Dkt. Samia Suluhu Hassan, kwa kuanzisha Wizara ya Vijana, ambayo kwa sasa inaongozwa na Waziri Joel Nanauka. Alisema wizara hiyo imekuwa chachu ya maendeleo ya vijana nchini kupitia sera na mikakati madhubuti.
Kombe la Tupendane Cup ni sehemu ya mikakati ya kuendeleza michezo katika kata ya Makangarawe, na ni mwendelezo wa mashindano mengine yatakayoandaliwa na Mbunge Kisangi kwa kushirikiana na Diwani Mboga. Lengo kuu ni kuendeleza mshikamano, amani, na maendeleo ya vijana katika Wilaya ya Temeke.
Kwa ujumla, tukio hilo limeonesha dhamira ya dhati ya viongozi wa Temeke katika kuwekeza kwa vijana kupitia michezo, kama njia ya kujenga jamii imara na yenye matumaini kwa siku zijazo.
