Kinyogoli tumaini jipya kwa maendeleo ya jimbo la mbagala

 

Na Hawa Ismail- Dar es Salaam 

Mgombea wa nafasi ya ubunge wa Jimbo la Mbagala kupitia Chama cha Wananchi (CUF), Sheikh Said Kinyogoli, ameahidi kuleta mabadiliko makubwa endapo atapewa ridhaa ya kuwatumikia wananchi. Akizungumza na wanahabari, Kinyogoli alisema kuwa moja ya vipaumbele vyake ni kuboresha miundombinu ya barabara za mitaa ili kuifanya Mbagala kuwa mfano wa kuigwa katika miji mingine nchini.

Michezo na Maendeleo ya Vijana

Kinyogoli alisisitiza kuwa atatoa kipaumbele kwa sekta ya michezo kwa kuanzisha vituo vya kukuza vipaji na kuunda timu ya jimbo itakayoshiriki mashindano mbalimbali. Lengo lake ni kuwainua vijana wa Mbagala kupitia michezo na kuwapa fursa za kujifunza na kujiajiri.

Mikopo Isiyo na Masharti Magumu

Katika juhudi za kuinua uchumi wa kina mama na vijana, Kinyogoli ameahidi kufungua SACCOS ya jimbo itakayotoa mikopo kupitia mfuko wa Halmashauri bila masharti magumu. Hatua hii inalenga kuwasaidia wananchi kuanzisha miradi ya maendeleo na kujikwamua kiuchumi.

Afya na Miundombinu Kata ya Kibonde Maji

Kinyogoli pia ameweka bayana mpango wake wa kusimamia ujenzi wa daraja katika Kata ya Kibonde Maji pamoja na kuboresha huduma za afya. Amesema atahakikisha mahusiano bora kati ya wagonjwa na wahudumu wa afya, sambamba na kuandaa semina kwa wauguzi mara mbili kwa mwaka ili kuongeza ufanisi katika utoaji wa huduma.

Udiwani na Usalama wa Mtaa

Mgombea wa udiwani kupitia CUF, Mashaka Selemani Gadafi, amesema aliamua kugombea kutokana na changamoto zilizokuwepo Mbagala, ikiwemo ukosefu wa madalali wa vyumba na wizi wa mara kwa mara. Gadafi alieleza kuwa alisimamia upatikanaji wa leseni za makazi kwa wakazi wa Kata ya Mbagala Kuu na kuhakikisha kila mtu anapata haki yake.

Uongozi wa Busara na Maarifa

Katibu wa Jimbo la Mbagala wa CUF, Ibrahim Bakonzi, alisisitiza kuwa chama hicho kinashiriki siasa kwa kutumia maarifa ya hali ya juu. Alisema mbunge ni mwakilishi wa wananchi na lazima ajue mahitaji yao halisi ili aweze kuyatetea kwa ufanisi.

Elimu na Afya Bila Malipo_

Mwenyekiti wa Wilaya wa CUF, Said Mwishehe, aliahidi kuwa chama hicho kitasimamia elimu bure kuanzia shule ya msingi hadi chuo kikuu. Aidha, alieleza kuwa kodi za wananchi zitatumika kwa ufanisi na huduma za afya zitakuwa bure kwa Watanzania wote.